صحوة عال٥:٣٠ أو ٦ حسب وين ساكن المطلوب انك تكون في المكتب الساعة ٦:٣٠ لانه التحرك الساعة ٧. كله تمام وبنوصل عالوقت بس منظم الرحلة مش منظم و الناس ما بتوصل عالوقت أبدا وما بتتحرك من عمان إلا الساعة ٨:٣٠ إذا انت محظوظ طبعا لانه فلان نسي وفلا ما وصل وفلان ما رتب حاله من اول.
اول ما بتسأل انه لشو التأخير وليش قلتولنا رح نتحرك الساعة ٧ بيحكيلك don’t worry. يا أخي انا مش قلقان انا منزعج و معصب انه وقتي عم بضيع. (اخر جملة اقتباس من صديقة كانت معي عبرت عني وعنها)

ما كانت بداية موفقة لأول رحلة تجوال الي خارج محاولاتي الفردية الفاشلة في المنطقة بين السلط والفحيص.

المهم وصلنا وادي منشلة بحدود الساعة ١٠ وبدأنا الهبوط الى البحر الميت من ارتفاع ٣٠٠-٣٥٠ فوق سطح البحر و بمسار طوله بين ٥ و ٦ كيلومتر. صراحة تنسيق الرحلة وشرح الادلاء لترتيبات السلامة صار كثير أحسن بعد ما بدأنا التجوال في الوادي.

في الرحلة حسيت اني اتفوقت على نفسي الصراحة لعدة أسباب منها اني عندي خوف ولو انه بسيط من المرتفعات مع هيك نزلت ٤ شلالات بحبال (ارتفاعات الشلالات بين ٢٥ و ٥٠ متر!!!) لأول مرة بحياتي 🙂
تسلقت مرتفعات بسيطة و نزلت صخور مسافة ٦ و ٧ متر. اكتشفت نوع جديد من الم العضلات ونقص في اللياقة ومن الطبيعي اني حصلت على أوسمة شجاعة (أو تهور) على شكل خدوش في الأرجل 🙂

اهم من تجربتي الجسدية مع الوادي و تغلبي على بعض المخاوف كان شعوري بالسكينة في الوادي. هدوء وراحة بال مستحيل الاقيهم في المدينة أو حتى في اي مكان وصله تنظيم الإنسان للحياة فيه. ببساطة الارتباط بالمكان دون تدخل كان محررا.

الوادي صغير وفيه جدول مياه بطيء إذا بتوقف وبتسمع خرير المي رح ترتاح خصوصا انه شجر النخيل رح يعطيك لون اخضر مكمل لجمال الصورة.

حسب ما فهمت من الدليل في الرحلة هناك أكثر من ٢٠٠ وادي للتجوال في المملكة و بعضها سهل و بعضها صعب مثل وادي منشلة. خلاصة تجربتي الجميلة اني قررت أزور وديان أخرى والاهم اني رح أزور أماكن أكثر في الاردن (بالمناسبة عم بكتب وأنا في الباص متجها الى محمية ضانا 🙂 )
اللي زار وديان وشارك في رحلات تجوال يخبرني تجربته.
ملاحظة: منظمي الرحلة الى منشلة هم شركة الصحراء الاستوائية
Tropical Desert
وبغض النظر عن بعض التأخير كانوا رائعين وتحملوا قلة خبرتي

20121027-160525.jpg

20121027-160531.jpg

20121027-160622.jpg

20121027-160559.jpg

20121027-160645.jpg

20121027-160658.jpg

20121027-160736.jpg

20121027-160835.jpg

20121027-160431.jpg

20121027-160437.jpg

20121027-160449.jpg

20121027-160503.jpg

20121027-160516.jpg

Advertisements